Raunveruleiknum lokið skólaárið 2009-2010

Verðlaun í hinum árlega Raunveruleik Landsbankans voru afhent í dag föstudaginn 13. nóvember. Raunveruleikurinn er gagnvirkur hermileikur og hannaður sem fjármála- og neytendafræðsla fyrir efsta bekk grunnskóla. Um leið keppa nemendur í grunnskólum landsins sín á milli í þroskandi og spennandi leik.

Sindri Snær Svanbergsson nemandi í Snælandsskóla fagnaði sigri í einstaklingskeppninni árið 2009. Hópurinn "Litla Hraun", 10. bekkur Grunnskóla Fáskrúðsfjarðar sigraði í keppni bekkjardeilda. Alda Kristín Guðbjörnsdóttir, nemandi í Hagaskóla, varð í öðru sæti í einstaklingskeppninni og Guðmundur Ingi Óskarsson, nemandi Grunnskólans á Ísafirði, varð í þriðja sæti.

Sigurvegarinn í einstaklingskeppninni fékk að launum glæsilegan iPod nano. Aðrir vinningshafar í einstaklingskeppninni og allir nemendur 10. bekkjar á Fáskrúðsfirði unnu sér inn iPod shuffle. Sigurvegarar í báðum flokkum tóku forystu strax í upphafi leiks og héldu henni allt til loka. Slíkt hefur ekki gerst fyrr. Stigasöfnun var mun meiri en áður hefur þekkst.

Um Raunveruleikinn

Raunveruleikurinn er gagnvirkur hermileikur, hannaður sem fjármála- og neytendafræðsla í efsta bekk Grunnskóla. Með Raunveruleiknum eiga nemendur að fá innsýn í þær ákvarðanir sem venjulegur þjóðfélagsþegn þarf að taka á lífshlaupi sínu og hvaða tækifærum og hindrunum sem hann stendur frammi fyrir í lífunu.

Raunveruleikur er keppni og er spilaður í fjórar vikur. Þátttakendur verða að skrá sig inn alla virka daga og vinna verkefni. Meðan á leiknum stendur þurfa þátttakendur að taka fjölda ákvarðana, lesa örlög sín, fylgjast með fréttum, athuga með atvinnu og bregðast við öllu því sem á daga þeirra drífur.